以下內容並非虛構，如有雷同，肯肯定唔係巧合。
客人A: 喂，幫我搵個客戶服務主任，要靚女，萬五蚊budget。
我: 哦，係咪坐櫃位，幫下公公婆婆填入數紙，維持排隊秩序嗰種?
客人A: 唔係，聽電話之嘛，啲人打嚟查詢呀投訴呀，問銀行戶口點開呀，銀行policy呀， 好似接線生咁囉。
我: 唔係企分行嗰啲cs?
客人A: 唔係，對住部電腦，坐我地卡中心之嘛，唔會有客上嚟，好簡單架咋。
(咁點解要靚女? 畀個電腦mon睇呀?)
**********
客人B: 有冇Events Project Assistant，急，搞展覽同埋場地報價, 兩年經驗，16K
我: 有, 手上有個幾醒目，態度又積極
客人B: 男仔定女仔?
我: 男仔, 三年經驗，佢之前14K, 叫15K咋
客人B: 要女仔呀
我: 點解既?
客人B: 阿頭鍾意請女仔，成team都係女仔，唔好擺個男仔入嚟喇。
(你公司峨嵋派?)
**********
你以為搵我哋agency嘅客先至咁奄尖或者有性別歧視? 少年, 你真係太年輕喇。雖然而家有哂法例規管，唔可以喺招聘廣告上限制求職者嘅性別，不過把尺其實唔喺任何法例入面，而係喺僱主個心入面。
如果僱主一心要女仔，佢收到cv見你係男仔，一樣可以丢埋一邊，冇法例要求僱主提交報告, 講明收到幾多份cv? total幾男幾女? 點解揀陳小姐唔揀黃先生?
過往做普通公司嘅内部HR，我已經明白呢個玩法, 部門經理叫我幫佢哋請人， 有7成都會加一句: 「要女仔」，其中有一次Sales team個阿哥話要請sales，指定要男仔，我心諗: 「咦，原來唔係全公司盲目傾向一個性別喎」，點知請完返嚟先至知，個男sales要經常返大陸，落桑拿落club應酬啲客，飲酒就更加在所難免。
後來做headhunter，發現同樣情況喺社會上好常見，對住個電腦mon唔使出街都要請靚女，試過有個客問搵唔搵到mix嗰類，你老味夜總會呀呢度? 咩mix呀? 深圳 mix 湖南算唔算mix呀?
最近有一次，一間細公司請merchandiser, 個老闆話要仔，心諗好罕見喎，點知個老闆接住落: 「要有車牌」，我正思疑自己啲英文係咪咁差，driver咁簡單都聽左係「咩春die sa」，點知唔係呀，條友嚟真，佢話公司少人，要幫手車啲貨畀客, 鑑於佢哋做晚禮服， 所以啲貨係好大件好重，每次幾廿件，一星期兩至三次，有時星期六日要OT，會補返假，明白，即係好似啲CID便衣，一星期7日，24小時on call，呢個職位名應該叫「merchandriver」啦，方中sir啲friend呀，混合字。
我好珍惜嗰啲冇限制性別，冇以貌取人嘅客，佢哋真係做到男女平等，以能力揀人，通常遇到呢啲好客，我都會加多兩錢肉緊去幫佢搵人。職場上嘅性別歧視或傾斜，大家表面睇唔到，其實唔代表唔存在。
Search